Hvar kaupir fólk plötur í dag?

Eru kannski allir hættir að kaupa útlenskar plötur? Safnar enginn plötum lengur?

Ég hef ekki keypt plötur í íslenskum búðum síðan Þórhallur og allir hinir hættu í Skífunni þegar þeim var sagt upp og boðin lægri laun. Í staðinn komu glansfínar unglingstelpur sem þú gast bókstaflega horft í gegnum og vissu bókstaflega ekkert. Það hefur kannski breytst en ég á þóbægt með að trúa því.  Það geta örugglega margir sagt kyndugar sögur af tilsvörum starfsmanna. Síðast þegar ég leit inn í Skífuna í Kringlunni (til að ná í hljómleikamiða) gat ég ekki betur séð en DVD myndir dekkuðu um 75% prósent búðarinnar.

Og ekki eru meira en 100 titlar til á öðrum plötuútsölustöðum. Kannski í 12 tónum, en þangað held ég að ég eigi lítið erindi með minn tónlistarsmekk.

Kannski kaupið þið frá Amazon UK eða USA? Ekki skrítið, mjög gott almennt úrval og oft betra en að fara inn í HMV eða Virgin í London, en samt gæti það aldrei bjargað mér og mínum áhuga, ég vil eiga allt með vissum listamönnum, fyrstadagsútgáfur, stundum vinyl, endurútgáfur, smáskífur og fleira.

Þess vegna hef ég haldið áfram að panta frá mínum gömlu góðu birgjum, þeir eru kannski ekki alltaf ódýrastir en þeir eru drjúgir að sinna mér og oftast ódýrari en Amazon þegar allt er greitt.

Ég hef leyft nokkrum gömlum viðskiptavinum að vera með mér í þessu og panta í gegnum mig.

Ef fleiri hafa áhuga þá getið þið sent mér línu [e-mail]

En endilega, mig langar að vita hvar þið kaupið plötur ef þið kaupið ennþá plötur (CD/ LP / ect)

kær kveðja Halldór Ingi

 

Skrár tengdar þessari bloggfærslu:

• Pöntunarlisti 9 2007

Athugasemdir

[Júlíus Valsson, 10.10.2007 kl. 21:40]

Mæli með Geisladiskabúð Valda á horni Laugavegs og Frakkastígs.

[Júlíus Valsson, 10.10.2007 kl. 21:43]

..hann slær þér þó ekki við Dóri minn! Þú hefðir ældrei átt að hætta.

[Halldór Ingi Andrésson, 10.10.2007 kl. 21:50]

Fallega sagt Júlíus, en búðin mín var allt of lítil og ég þrjóskaðist allt of lengi. Ég var nokkuð ánægður með fyrsta árið í Virgin Megastore, þar sem við bættist magnsala af alls kyns tónlist, líklega allra besta búð sem verið hefur á Íslandi og átti góðan grunn en þú stofnar ekki fyrirtæki til að hefna þín eins og mér fannst sumir eigandanna gera! En er Valdi samt ekki bara að selja notað?

[Björn Jónsson (IP-tala skráð) 10.10.2007 kl. 22:23]

Valdi selur ekki bara notaða diska, sennilega er það minnihluti. þar geri ég oft góð kaup þegar ég bregð mér í borgina, hann er nefnilega með alskyns seventís stöff, já og jafnvel sixtís líka sem maður fær hvergi annarsstaðar hérlendis. Ágætt fyrir þá sem eru ekki á þessari beinu vinsældapopplínu.

[viðar J Ingólfsson (IP-tala skráð) 18.10.2007 kl. 19:50]

Blessaður Haldór, ég stend fast á því að Tónspil á  Neskaupstað sé besta plötubúð landsins. Algjörlega magnað úrval af gæðatónlist og einnig það sem ekki er verra að hann Pétur sem á og stjórnar þar öllu er mjög viðræðugóður um allann fjandann sem viðkemur tónlist fyrr og síðar, en hann var trommari í hinni mjög svo góðu sveit Amon Ra hér í den,einn sá allra besti.

[Halldór Ingi Andrésson, 20.10.2007 kl. 16:20]

Ég get vel trúað því Viðar, en ég hef aldrei heimsótt hann Pétur en oft rætt við hann bæði þegar hann kom til mín í búðina og líka eftir það og stundum pantað fyrir hann efni sem hann hefur ekki náð í.